മുറിവ് കാരണം മുഖത്തോ കൈകാലുകളിലോ നിര്ബന്ധ സാഹചര്യത്തില് പ്ലാസ്റ്റര് ഇടേണ്ടി വന്നാല് വുളൂഅ് ചെയ്യുന്ന സമയത്ത് അത് മാറ്റാന് ബുദ്ധിമുട്ടാണെങ്കില് തയമ്മും ചെയ്യാം. അപ്പോള് തയമ്മും ചെയ്തു നിസ്കരിച്ച നിസ്ക്കാരത്തെ മടക്കണമോ വേണ്ടയോ എന്ന് ചോദിച്ചാല് അഞ്ച് അവസ്ഥകളില് നിന്ന് മൂന്ന് അവസ്ഥകളില് മടക്കണമെന്നും രണ്ടവസ്ഥകളില് മടക്കേണ്ടതില്ലെന്നും ഫത്ഹുല് മുഈനിന്റെ വ്യാഖ്യാന ഗ്രന്ഥമായ തര്ശീഹില് നിന്ന് വ്യക്തമാകുന്നു.
പ്ലാസ്റ്റര് തയമ്മുമിന്റെ അവയവത്തിലാണെങ്കില്
(മുഖത്തിലും രണ്ടു കൈകളിലുമാണെങ്കില്)
കാരണം, വുളൂഉം പകരമുള്ള തയമ്മുമും അപൂര്ണ്ണമാണ്.
പ്ലാസ്റ്റര് തയമ്മുമിന്റെ അംഗത്തിലല്ലെങ്കില് അത് പിടിച്ചു നില്ക്കാനാവശ്യമായതിലപ്പുറം മുറിവില്ലാത്ത സ്ഥലത്ത് നിന്ന് പ്ലാസ്റ്ററില് ഉള്പ്പെടുക. വലുതോ ചെറുതോ ആയ അശുദ്ധിയില് നിന്ന് ശുദ്ധി വരുത്താതെ പ്ലാസ്റ്ററിടുക ...
മടക്കേണ്ടതില്ലാത്ത അവസ്ഥകള് :-
ചെറുതും വലുതുമായ അശുദ്ധിയില് നിന്ന് ശുദ്ധിയായ അവസ്ഥയില് പ്ലാസ്റ്റര് ഇടുമ്പോള് അത് പിടിച്ചു നില്ക്കാനായ സ്ഥലം മാത്രം മുറിവില്ലാത്ത സ്ഥലത്ത് നിന്ന് ഉള്പ്പെടുന്ന അവസ്ഥ. ചെറുതും വലുതുമായ അശുദ്ധിയില് നിന്ന് ശുദ്ധി വരുത്തിയില്ലെങ്കിലും മുറിവിന്റെ അപ്പുറം തീരെ പ്ലാസ്റ്ററില് ഉള്പ്പെടാത്ത അവസ്ഥ.
പ്ലാസ്റ്റര് ഇട്ടത് തയമ്മുമിന്റെ അവയവം അല്ലാത്ത കാലിനും തലക്കും ആകുമ്പോഴാണ് നിസ്ക്കാരം മടക്കേണ്ടതില്ലായെന്നു പറയുന്ന ഈ രണ്ട് അവസ്ഥകള് പരിഗണിക്കപ്പെടുന്നത്. പ്ലാസ്റ്റര് മാറ്റി വുളൂഅ് ചെയ്താല് ബുദ്ധിമുട്ടുണ്ടാകുമെന്ന് ഭയക്കുന്ന സമയത്താണ് തയമ്മും അനുവദിക്കുന്നത് എന്ന കാര്യം പ്രത്യേകം ശ്രദ്ധിക്കുക.
രോഗം കാരണം തയമ്മും ചെയ്തവരും കെട്ടോ പ്ലാസ്റ്ററോ ഇല്ലാത്ത മുറിവിനു വേണ്ടി തയമ്മും ചെയ്തവരും നിസ്ക്കാരം മടക്കേണ്ടതില്ല. എന്നാല് കെട്ടാത്ത മുറിവില് ധാരാളം രക്തമുണ്ടാവുകയും അത് കഴുകിക്കളയുന്നത് ഭയക്കുകയും ചെയ്യുന്ന സന്ദര്ഭത്തില് നിര്വ്വഹിച്ച നിസ്ക്കാരം മടക്കേണ്ടതാണ്...
ശക്തമായ തണുപ്പുള്ളപ്പോള് തണുപ്പ് മാറ്റാനോ വെള്ളം ചൂടാക്കാനോ സൗകര്യം ലഭിക്കുന്നതോടൊപ്പം തയമ്മും ചെയ്തു നിസ്ക്കരിക്കാന് പാടില്ല. എന്നാല് അതിന് അസൗകര്യം നേരിട്ടാല് തയമ്മും ചെയ്തു നിസ്ക്കരിക്കുകയും പിന്നെ മടക്കുകയും വേണം...
സാധാരണ വെള്ളം കിട്ടുന്ന ഒരു സ്ഥലത്ത് അപൂര്വ്വമായി വെള്ളം കിട്ടാതെ വരുമ്പോള് അവിടെയും തയമ്മും ചെയ്തു നിസ്ക്കരിക്കുകയും പിന്നെ മടക്കുകയും വേണം...
ഹറാമായി ഗണിക്കപ്പെടുന്ന യാത്ര ചെയ്യുന്നവരും തയമ്മും ചെയ്തു നിസ്ക്കരിച്ചാല് മടക്കേണ്ടതാണ്...
തടവേണ്ടതുണ്ടോ?
വുളൂവോ തയമ്മുമോ ചെയ്യുമ്പോള് അവയവത്തില് മുറിവുണ്ടെങ്കില് അതില് വെള്ളമോ മണ്ണോ കൊണ്ട് തടവണമോ എന്നു നോക്കാം :
അവയവത്തിലുള്ള മുറിവില് മറയില്ലെങ്കില് വെള്ളം കൊണ്ട് തടവേണ്ടതില്ല. തയമ്മുമിന്റെ അവയവമാണെങ്കില് മറയില്ലാതിരിക്കുമ്പോള് മണ്ണുകൊണ്ട് തടവണം അത് നിര്ബന്ധമാണ്. എടുത്തുമാറ്റാന് പ്രയാസമുള്ള മറ അവയവത്തില് ഉണ്ടെങ്കില് വെള്ളം കൊണ്ട് തടവല് നിര്ബന്ധമാണ്. മണ്ണ് കൊണ്ട് തടവേണ്ടതില്ല...
ഉദാ: തയമ്മുമിന്റെ അവയവമായ കൈയ്യില് കുറച്ചു സ്ഥലം വെച്ചു കെട്ടിയിട്ടുണ്ടെങ്കില് പ്രസ്തുത അവയവത്തിനു വേണ്ടി തയമ്മും ചെയ്യുമ്പോള് വെച്ച് കെട്ടില്ലാത്ത സ്ഥലത്ത് തയമ്മും ചെയ്യുകയും വുളൂഅ് ചെയ്യുമ്പോള് വെച്ചുകെട്ടില്ലാത്ത സ്ഥലം കഴുകുന്നതോടൊപ്പം വെച്ചു കെട്ടിന്റെ മുകളില് വെള്ളം കൊണ്ട് തടവുകയും വേണം ...